民建聯噚晚舉行25周年會慶酒會，作為第一保皇大黨，新班子畀足面空群而出，特首林鄭月娥、三司及多名局長均有出席，兩名前特首董建華同梁振英及中聯辦主任張曉明亦同場主禮。
唐唐讚開局唔錯
777同689同場，份外有張力，影大合照時大家都幾乎肩並肩，惟獨二人中間有條明顯「鴻溝」。林鄭致辭時提到民建聯創黨主席曾鈺成講過同政府有辱無榮，林鄭就話之前出席民建聯路向營時講，只要政府做到良好管治、以民為本，就可以為建制政黨減壓甚至「分紅」，佢笑笑口話當時講法咁大膽，係因為「以為唔使我做」。嘩！當住CY面咁講，繼續皮笑肉不笑嘅CY應該百般滋味在心頭。
全國政協常委唐英年亦有現身，大讚林鄭開局唔錯，但第一個挑戰係蔡若蓮，認為林鄭應堅持用蔡，仲用劉江華做例子，證明輸咗立法會都可以喺政府度做得好。第二個挑戰係一地兩檢，自爆做政務司時處理興建高鐵，政府當時已諗住倒模深圳灣模式，未提交立法會係因為好多問題答唔到，「唔想半生熟嘅嘢上嚟畀人問到口啞啞」。