即日開始又多三種期貨炒，噚日港交所（388）為推出兩種新嘅黃金期貨，隆重其事，首度搵來兩位6歲嘅金童玉女敲鑼開市！
聽講，呢個係港交所行政總裁李小加嘅idea，有同事就「獻出」兩位小朋友，兩位都好淡定，見到咁多大人同鏡頭都唔怯場，兩個一齊打鑼仲齊過好多真正嘅上市公司老闆㖭。
其實港交所農曆新年開市都會搵小學生打鼓壯聲勢，幾次都見到小加真係好鍾意小朋友，好似佢噚日又好肉緊咁攬住「金童」，又同佢High five，父愛出晒嚟。
企喺銅鑼另一邊嘅證監會行政總裁歐達禮，可能因為分畀佢嘅係「玉女」，就顯得比較拘謹，只係保持禮貌微笑同安全距離。不過，亦有可能係因為歐達禮噚日一早參加開市儀式，冇得做Gym，有啲未瞓醒咁喇，小加仲乘機笑佢係運動狂㖭。