基斯坦奴朗拿度（C朗）精力充沛，用一年時間就反吸美斯之餘，仲要擴大領先優勢！我求大俠唔係講歐聯冠軍或者金球獎，而係仔女數目。C朗女友佐真娜被影到凸住個肚，去伊維薩島玩水，睇嚟C朗年底又做老竇，一年抱三！
喺今年之前，C朗剩係得小C朗一粒仔，但今年突然變做多仔公。喺今夏踢緊洲際盃期間，佢請代母生嘅龍鳳胎出世，一下子成為三個仔女嘅老竇，佢亦喺社交網站公佈咗呢個喜訊。同時，盛傳女友佐真娜已經大肚，但佢哋兩個未有承認。不過，大肚有樣睇，唔認都冇用。
英媒話陀住五個月囡囡
最近C朗帶住佐真娜同埋大仔小C朗去伊維薩島玩水度假，見到着住三點式嘅佐真娜肚仔凸凸，睇嚟真係似有喜喎，唔通係肚腩嚟咩！雖然身懷六甲，但佢就相當大膽，仍然走去踩水上電單車，C朗見到梗係要做乘客攬實佢，而佢上落電單車時更加捉到佢實一實，怕佢跣親。據英國《太陽報》披露，舊年先同C朗拍拖嘅佐真娜陀住個女，已經有咗五個月，如果順產的話，C朗屋企今年底又多個新成員嘞！佐真娜初初同C朗拍拖嗰陣係名店售貨員，但後尾冇做，最近轉行做模特兒。
傳同皇馬傾掂數
C朗一年抱三在望，加埋有四個仔女。喺仔女數目，美斯原本以兩個仔領先緊C朗，但呢位葡萄牙球星一年就反吸美斯！睇外媒嘅相，C朗就冇帶啱啱出世嘅龍鳳胎嚟玩水，相信留佢哋喺家鄉畀C朗阿媽照顧。C朗喺伊維薩島玩得好開心，仲有show吓身手，大玩水上飛板，不過C朗就失手，勁辳。
之前有報道話，C朗喺皇家馬德里唔開心，扭計想離隊，呢幾日就好似冇乜新消息咁，睇嚟佢已經同皇馬傾掂數。
佢嘅皇馬隊友莫迪歷都話，從來冇聽過C朗話想離隊，「我從未聽過基斯坦奴話佢想走。當然喺足球嘅世界係冇嘢不可能發生，但我覺得以C朗同皇馬嘅關係咁好，佢一定會留番喺皇馬。」因為C朗今夏踢咗洲際盃，所以皇馬畀佢八月頭先至歸隊。