堂堂萬泰集團大老闆，竟然為一蚊雞講價？自由黨榮譽主席田北俊發生乜事，令身世離奇突變？查實田少只係喺港台廣播劇《廿年》單元故事〈回流〉入面飾演露宿者。
故事講述田少因為生意失敗，流落做咗露宿者，由民政事務局前常秘李麗娟飾演嘅田少家姐，就喺美國返港到深水埗舊區搵細佬，劇中嘅田少買菠蘿包時為咗慳$1.4而同游學修飾演嘅店員講價，現實中應該唔會發生。田少直指自己做生意幾成功，大呻難投入，「唔知點演好」。
至於要做田少嘅家姐，李麗娟就話好樂意亦好開心，話田少雖然畀人不食人間煙火印象，但對方心地不知幾好︰「He does not have a mean bone in his body.」
田少喺廣播劇中亦開金口，自選經典金曲《浪子心聲》，唱出劇中生意失敗淪為露宿者嘅心情，「雷聲風雨打，何用多驚怕……」，節目會喺周三（12日）晚上11點港台1台播出。