特首林鄭月娥班子上場後，預料8月公佈各政策局副局長同政助人選。八方聽聞唔少人已經答允接任，但因為現職未辭，唔可以公佈住，而除咗近期「紅」爆嘅蔡若蓮，香港團結基金副總幹事李浩然（圖）同樣係極具爭議性嘅副局人選。
網媒《巴士的報》早喺6月底已報道政府向李浩然招手，報道都話李浩然經歷幾特別，話土生土長嘅佢喺浸大讀政治及國際關係，於北京清華讀過憲法學博士後，竟然去咗貴州省貴陽市息烽縣做官，擔任縣長助理。
唔係自己人，點會被委以重任？睇返佢喺清華讀博士時，師父就係時任清華法學院院長王振民，即係現任中聯辦法律部部長，報道話佢獲薦係因為精通《基本法》及熟悉一國兩制。據聞李浩然會喺劉江華掌舵嘅民政局任副局長，兩位紅色拍檔肯定係惹火尤物。