今年42歲嘅車婉婉前晚同中澳混血老公Jonathon Quinlan為囝囝Justus搞百日宴茶會，請咗五十幾位圈中好友參加，當中有鄭秀文（Sammi）、徐濠縈、鄭伊健、杜琪峯夫婦、蘇永康夫婦、孫耀威同老婆陳美詩，其中最為特別嘅係粵劇名伶吳君麗都有到場。
熱情逗Sammi
由於Justus出世時已屬米芝蓮巨B，接近9磅重，當時婉婉已幫佢改咗BBQ嘅花名，加埋佢餵人奶，BBQ喺3個月大時，已經重達18磅，前晚見婉婉抱起囝囝時有啲吃力。婉婉話BBQ有備而來，朝早瞓夠食飽，所以心情靚，仲笑囝囝同Sammi、阿徐合照時眼仔睩睩望實，佢話：「Party開始時極有主人家風範，尤其見到靚姨姨時，主動和她們溝通，很是熱情，逗得姨姨們高興非常。」
婉婉同老公抱住BBQ切蛋糕，而蛋糕造型係一個「Q」字嘅日本飯糰，佢留言解釋：「有人問，點解個蛋糕係嚿飯？答案係……BBQ仲有個外號─大嚿飯！（同佢嘅重量係有直接關係嘅）Baby，想告訴你這是我們人生最開心的100天。」
撰文：馮仁昭
