鄧麗欣（Stephy）曾是港青排球隊的成員之一，為繼續追逐排球夢，自資組成Loey排球隊，過去一年參加過多場賽事，成績算是中規中矩，但昨日由Stephy親身領軍到大埔參加的「第37屆全港公開排球錦標賽」乙組比賽，卻不幸輸掉比賽之餘兼要降班，明年被降班落丙組。Stephy賽後接受訪問時，明顯相當失落，她說：「其實輸咗第一局都係平常心，不過講係咁講，頭先比賽都有啲緊張，自己都好大壓力，表現得唔夠好，失咗喺好多平時唔會失嘅分。打波好有趣，你一個打得唔好就好似傳染病咁，不過唔係贏就係輸，冇辦法。」
不再出賽
Stephy認為落敗的主要關鍵是太緊張：「因為呢場比賽太關鍵，我自己都有壓力啦！何況啲隊友，就更大壓力。」她還調侃自己要安排「身後事」，為保留球隊必須加倍努力，因為降班丙組，要升班將遇重重困難，她說：「不過畀我哋自己揀，當然梗係想一齊贏一齊輸啦！成個過程點面對逆境先最重要。如果要再打聯賽，要等到明年3月，不過丙組要打室外場。」Stephy自嘲年紀大，預告明年將會消失於排球場上，而且今年投放太多時間在排球隊身上，要拍戲就必然會疏於練習：「我唔想放棄球隊，想培育新人，我哋有幾個球員都係得十幾歲，身材又夠好。」
導演話事
此外，對於葉念琛找來蘇麗珊替代Stephy拍方力申，演出其系列愛情小品的女主人翁「阿寶」一角，Stephy說：「『阿寶』唔只得我一個人做過，葉念琛套套戲女主角都叫『阿寶』，唔係叫取代。總之我唔覺得取代，都唔關我事，佢都冇搵我拍。」會否介意和舊愛方力申合作？她即謂：「睇吓導演介唔介意啦，可能到時你哋圍晒喺度，根本都拍唔到呢！」
採訪：盧妹
攝影：陳慧安