新一屆娥班子上場後，開步似乎好順噃，暫時行政立法關係好和諧，同以前梁班子時代有天壤之別（當然高鐵一地兩檢方案出爐後，和氣可能變火氣），唔知呢番景象，對上屆局長嚟講係咪別有一番滋味在心頭？食物及衞生局前局長高永文離開熱廚房後，噚日出席商台節目被問到過去5年生涯覺得點？佢直言「唔知點答你」，「你……你個問題幾簡單……我都唔知點答你……我都唔知點答你」，有口難言咁噃！
問佢過去5年咩事最深刻？佢就即刻答到嘞，話係要時刻守護香港，唔好被傳染病攻擊，「每日都喺度諗，戰戰兢兢咁去擔心」；佢亦提到任內喺一啲問題上，如發展公私營醫院要並重達到共識，提出嘅措施亦按部就班進行緊，但相信要一段時間先見成效。
卸任後「輕鬆咗」
未能喺立法會通過改革醫委會嘅《醫生註冊（修訂）條例草案》，相信都算係佢任內未了嘅心願，民望高話草案有助紓緩公營醫院人手壓力，希望社會繼續支持。
其實卸任後嘅生活，同以前有乜分別？民望高話唔覺得有乜分別喎，但引述朋友就話佢「輕鬆咗」，「我自己真係唔知」，他分析話覺得可能因為以前做局長時，每朝起身第一件事就係睇電話、睇下有乜新聞發生，𠵱家就唔使做呢啲事，相對輕鬆啲。至於講到新一屆政府，民望高都覺開局嘅運作氣氛比較順利，希望情況可以持續！
李八方