但凡有上市公司董事忽然轉做非執董，多數係想同公司好來好去，好似新世界發展（017）前聯席總經理陳觀展，佢今年3月轉做非執董，本月初辭埋非執董，聽講，佢已經有新路數，就快去深圳房企龍光（3380）做高層喇。
陳觀展加入新世界前，曾於內地政府部門工作多年，包括廣州市政府擔任處長等職務，2004年加入國企越秀系，做到越秀發展董事長，又做過越秀交通基建（1052）執董，今次過檔龍光，算係回歸中資企業。
佢6年前加入新世界，傳聞係新世界主席鄭家純搵佢加盟，搵佢同新世界第三代接班人鄭志剛一齊做聯席總經理。咁啱今年初鄭家純中風接受治療，公司就話陳觀展轉做非執董，鄭志剛坐正做總經理，難免惹來外間多種猜測。
不過點猜都好喇，最緊要係，陳觀展已經有好路數。龍光市值320億元，今年初夥拍合景泰富（1813）投得鴨脷州地王，風頭一時無兩，搵埋陳觀展坐鎮，肯定係想有一番作為。
陳觀展今年只係57歲，離退休仲有大把時間；而龍光近年喺深圳亦發展得好好，近排好多大行唱好佢有大灣區概念，土儲又以深圳為主；兩方面都有心有力，難怪一拍即合喇。