喺同一個電影圈，演員同導演，好難唔相見。
黃秋生同王晶一樣，喺香港電影圈打滾咗幾十年，兩人第一次相遇，係喺90年王晶做導演嘅《絕橋智多星》，之後兩人再合作咗至少五部電影，包括93年《逃學威龍3之龍過雞年》、96年《伊波拉病毒》、03年《黑白森林》、05年《瘦身》、09年《金錢帝國》。
秋生前晚突然喺facebook爆seed，先喺開post揞名指摘「王老吉」，唔好起用一個病人做演員，再喺回覆中表示睇到王晶講嘅嘢，忍唔住，又嬲咗。
係，又嬲咗，因為秋生同王晶，自從14年佔中以來，呢幾年先後出現好多恩怨：
先喺14年10月，秋生以演藝學院校友會主席身份，喺facebook譴責香港警察使用暴力清場，王晶於微博反擊，指要同秋生、杜汶潭、何韻詩絕交。
同年11月，秋生主演電影《大茶飯》上映，但內地版海報將秋生大頭抽起，王晶又於微博抽水，被秋生斥賤格。
到15年10月，秋生表示佔中時在上海拍攝劇集《梟雄》，王晶又於微博挑釁：「有膽你o依在這裏講一句！我黃秋生反佔中，支持8月30（8月31日）人大的普選决定，我收回一切對你的批評並向你道歉！」 結果秋生之後回覆網民，稱：「他真自我感覺良好，以為别人很稀罕他的道歉。不見他批評發哥去？」
秋生敢言，與舉起「愛國愛黨」旗幟嘅王晶互相搏火，更一度被傳打入黑名單，遭大陸封殺。