王浩信、蔡思貝、張振朗同李佳芯主演嘅《踩過界》o依家喺無綫一星期播2集，因為今次係合拍嘅關係，所以大陸愛奇藝版一早已經播晒第一季嗰14集，唔少人都好期待第二季嘅播映，因為大家都想睇吓王浩信同朱千雪呢一對，會唔會延續《EU超時任務》嗰段情。
但係就算有幾多人睇過大陸嘅版愛奇藝都好，到咗星期六日，好自然又會打開電視再睇多一次，有網民喺網上留言，佢哋睇完蔣家旻同許家傑嗰啲虐待場面，有人覺得場面好迫真，睇落覺得好心寒之外，仲有人覺得無綫嘅版本同愛奇藝個版本有啲出入，喺無綫嗰個版本見到好多許家傑近鏡鞭打場面，甚至近鏡見到蔣家旻咬住口塞個慘慘樣；反而愛奇藝嗰個版本呢，就見唔到呢一場喎。
其實大陸要河蟹暴力、性、虐待嘅劇情，所以要睇香港版先睇到，除咗蔣家旻被虐待嘅場面睇唔到，就連打交都睇唔到，好似前晚嗰集咁，有場就係成班人喺酒吧打交，蔡思貝仲為咗保護王浩信，搞到隻手受咗傷，不過喺大陸版呢，就冇咗呢一場，只係講咗兩句，王浩信擋咗個煙頭，就轉咗去下一場戲，所以如果睇大陸版的話，係唔會知點解蔡思貝隻手會受傷。
話晒香港同大陸兩個地方嘅尺度有唔同，所以出現河蟹版本亦都正常，有傳媒問過監製林志華，佢只係話：「你睇到乜嘢就係乜嘢！好正常！」