郭鋒太太歐陽佩珊昨日病逝，曾跟她合作的藝人都感到很愕然！
林漪娸：
我好多年前跟佢學過氣功，佢好認真咁教我哋，講解得好清楚，佢為人正正直直，一就一、二就二。
林嘉華：
郭鋒話歐陽佩珊好鍾意《發現灣》，佢仲問我有冇留底，不過我啲錄影帶喺加拿大，近年見到有DVD，可惜未能通知佢哋。
魯振順：
自己身體唔係好妥，我跟咗佩珊學氣功，真係唔相信一個咁強勁嘅氣功師會有咁嘅結果，我知道佢作息好定時，亦知道佢對鋒哥好嚴謹。
甘國亮：
我哋合作過《執到寶》，因為我年紀大過佢，最希望佢冇受太耐折騰，希望佢係好安落咁去，當然為佢留喺度嘅另一半節哀，其實4月到𠵱家咁快唔喺度，可能係福氣！
賈思樂：
十年前我跟佢學氣功，佢同我講氣功唔係一朝一夕，易學難精，所以要好好學習，今日知道佢走咗，我接受唔到。
羅蘭：
佢飾演過我個女，印象中佢係一個好好嘅人，對工作好認真，曾經搵過佢做梅花針針腳。
曾志偉：
𠵱家成日都聽見呢啲消息，可能年紀大喇，盡情享樂、開心啲係好重要。
黃杏秀：
我都好耐冇見佢，有30幾年，我哋訓練班張美琳都係因病逝世，唔夠兩個禮拜就到佩珊，好唔開心，印象中佢好nice，好文靜。
黃淑儀：
聽到覺得毛管戙，知道佢一向都好低調，我哋以前喺麗的有合作。
