近年隨住互聯網發展，網上直播呢樣嘢開始興起，而喺亞洲，大陸同台灣嘅網上直播網站搞得有聲有色，只要你手上有一部電腦、一部手提電話，你就可以做直播主持，自己拎起部機就隨便影。
所謂嘅網絡直播其實就係透過直播軟件同觀眾互動，而只要登錄網站或者下載手機Apps就可以成為觀眾或者直播主，一般會分為遊戲直播（即係睇人打機）又或者係聊天型直播（即係影住自己同觀眾傾計），觀眾可以喺聊天室打字俾直播主睇，而直播主一般就會影住自己再睇聊天室內容同觀眾交流，咁開發呢種軟件同埋做直播主有咩好處呀？其實呢一類軟件一般都會有一種代幣俾用家儲值，而今次前o靚模Cammi（謝芷蕙）揀嘅軟件，300粒代幣就要價約45蚊港幣（150台幣)，而代幣可以購買各類型道具送俾直播主，而直播主收到代幣後更加可以再兌換成現金！根據軟件官方網站排行榜，坐擁唔少Fans嘅Cammi喺上周嘅一周排行排名95位，一共賺咗157691粒代幣，折合港幣約6000蚊，而今個星期都仲未完，但係Cammi就已經喺排行榜上衝到46位，賺咗成196592粒代幣，即係成差不多7000蚊港紙，雖然離每周排行第一成7萬銀港紙好遠，不過半個月賺萬三銀，都咪話唔和味。