上個星期嘅香港政壇，似乎有啲反常，特首落區冇人狙擊、去答問大會又冇議員掟嘢，社會回復多年不見祥和狀態，可能係，暴風雨前夕嘅先兆喎，皆因林鄭班子本周公佈高鐵一地兩檢方案，內地人員喺香港嘅執法權問題，勢必引起新一輪風波，一如林鄭自己所講，留意到部份法律界同政界話明一定反對，所以班子都要迎難而上加強解說，據聞唔少建制政黨中人預咗暑假大作戰，喺社區動員幫手做民意戰。
花生友聽聞，其實一地兩檢嘅方向細節，早喺梁班子時期已經敲定，如果要出爐，唔係唔可以，但必死無疑，皆因梁班子民意支持同認受性好低，完全不能領導社會作理性討論，就算要打民意戰，由「梁粉」大軍造勢喎，又點會有說服力？若然由市民反感較低嘅娥班子力推，至少都有一線生機，因為事件已成政治爭議而非技術考慮，成功與否，或關乎一個「信」字，林鄭首周極力營造親和之旅，顯然都為首場大戰積聚民意子彈。
按政府時間表，本周公佈細節後，10月中立法會復會就會提交立法建議；由於想如期喺明年第三季通車，據聞最理想係喺年初通過，以便有時間預備，否則時間好緊迫。律政司司長袁國強會喺呢場硬仗專責解說方案係咪違反《基本法》等法律爭議，娥班子則主力以要唔要一條有實際效用往返中港嘅鐵路造勢，分頭作戰。花生友相信無論在公在私，袁國強都好想方案快啲過關，法律界流傳佢嘅辦公室明年1月起租（由𠵱家計起確實就係傳言為方案留任半年嘅時間），如果最終一地兩檢係拖延戰，相信有腸胃病嘅佢嘅身心都會赤赤痛！
花生友