青年發展係新特首林鄭月娥重點工作，難怪娥班子積極論及青年事務，政務司司長張建宗噚日就發表題為「『青年號』啟航」網誌。
負責網站更新
篇文話政府推出多項內地同海外交流、實習、工作假期、在職培訓同師友計劃畀青年人參加，又資助年輕人到一帶一路沿線國家交流考察，三批港青仲會喺暑假分別到甘肅敦煌、四川卧龍同北京故宮博物院實習，學習文化遺產同自然生態保育知識，hardsell機會難逢。
而佢嘅office最近亦有5位實習生，喺CS下嘅效率促進組負責網站更新、設計同支援工作，小肥張話會邀請佢哋一齊出席公開活動，希望從中更關心同聆聽年輕人嘅心聲。
小肥張有時都鍾意搞爛gag，例如將「二流」班子形容為「易流」團隊，佢今次就話當年出任勞福局局長時提出過嘅「安老號」、「扶貧號」同「助弱號」已經揚帆出海，𠵱家怕且要加埋「青年號」呢支生力軍同行。