昨日凌晨，姚子羚喺網上貼咗佢同姊妹「胡說八道」嘅聚會相，相中見到陀B大約5個幾月嘅杏兒，佢嘅身型完全係長胎唔長肉，keep得非常好。跟住佢哋幾個好姊妹齊齊攬住杏兒一齊合照，姚子羚仲留言：「Our happy time ～契媽和baby lee有個約會 @黃智雯Mandy @胡蓓蔚 @胡杏兒 @李施嬅selena 你在何處？@胡定欣nancywu！」
啱啱喺橫店拍完《深宮計》嘅胡定欣，聽講嗰日返嚟香港嘅航班延誤，所以嗰晚未有現身出席聚會，冇耐定欣就喺IG轉發姚子羚嘅相片兼留言：「????我開始覺得......佢哋係有意排斥我!! 因為佢哋大部分時間都係喺我唔得閒同唔喺香港的時候約齊人....... 」跟住仲hashtag：「#胡說八道會 #影相仲要笑得好開心 #咁樣係咩意思 #我宜家好嬲 #leftgroup！」
唔少網民留言叫佢唔好咁做，仲幫其他成員好說話，姚子羚留言：「聚會又點可以冇咗定欣呀！其實我哋好random咁約！」定欣就話呢個理由唔成立，杏兒亦都留言：「邊個叫你咁忙啫！」定欣即刻回覆：「咁你養我，我咪唔忙囉！」杏兒好搞笑咁回覆：「好快有人養你㗎啦！使乜我喎！」昨日有傳媒分別向杏兒同定欣了解呢件事，佢哋兩個異口同聲：「當然係喇！」