相信唔少機迷同鐵道迷十幾年都玩過《電車GO!》系列遊戲一嘗當電車車長的滋味，但不過自2004年出完PS2版《電車GO! FINAL》後，TAITO就停止開發《電車GO!》，令到好多Fans大惑不解。
等到今年正值《電車GO!》推出20周年，TAITO終於出手，剛宣佈會推出復刻版《電車GO!》專用控制器《電車GO! PLUG & PLAY》，而且做法更似足迷你紅白機，將《電車GO! FINAL》遊戲植入專用控制器內，只需將控制器接上電視就即時可玩，夠晒方便！而且TAITO亦特別將2004年版本《電車GO! FINAL》高清化及改為16:9闊畫面設計，用720p畫面穿梭JR山手線、JR大阪環狀線、JR中央線（東京～高尾）同JR京都線‧JR神戶線（京都～大阪～神戶），點計都開心好多！標準版將會在7月10日開始接受預訂，但只限在Amazon.co.jp及Ebten網站訂購，價錢為14,800日圓（約$1,021），但要到2018年2月8日才出貨，真係唔知點解TAITO要搞咁耐。如果本身是日本Amazon Prime會員的話，更可以預訂「Prime Day」限定版復刻手掣，黃色機身都幾特別；不過這款限定版就只限在日本時間7月10日下午6時至7月11日晚上11時59分的30小時內接受預訂。
資料來源：TAITO
記者：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily