盧卡古嘅爭奪，上周六終於落幕。曼聯宣佈已經同愛華頓達成轉會費協議，只要等埋盧卡古完成體測同傾妥個人條款，就會落實加盟。盧卡古加盟紅魔，自稱Agent P嘅曼聯中場保羅普巴功不可沒，事關佢哋今夏合租美國洛杉磯比華利山豪宅度假，老友鬼鬼，不過因為開瘋狂party令鄰居不滿，搞到加州警方要出手拉盧卡古。
普巴同盧卡古都係超級經理人拉奧拿旗下，而且私底下好老友，𠵱家一齊喺美國玩，仲合租比華利山豪宅度假。佢哋七月二號喺豪宅開瘋狂party，就搞到鄰居報咗六次警，最終盧卡古以滋擾罪被捕，不過據報加州警方最後都冇落簿，口頭警告吓就放人，而且紅魔球迷都唔使擔心，呢啲罪最多都係罰款了事。