英超球星齊齊放暑假，身材少少走樣就少不免，但搞到曼聯中場米希達利恩咁樣俾人恥笑，就真係冇陰公。話說曼聯周四喺twitter上載MK恩着起新季新主場波衫嘅相，都係諗住sell吓新衫啫，點知佢個肚腩凸凸，就引來毒舌網民攻擊，甚至笑佢隨時生得咁呀！
毒舌可以去到幾盡？有網民就話可以幫曼聯出手用Photoshop執執個肚腩，更有網民話呢位28歲阿美尼亞國腳，好似網球女將莎蓮娜咁隨時生得……唔知曼聯小編係想抑制呢場風波，定係佢都頂唔順MK恩個肚腩，所以好快就將呢張相下架。適逢周四原來係MK恩成魔一周年，收到呢份「大禮」，唔知佢可唔可以好似上季咁先苦後甜呢？
盧卡古拍住普巴操
除咗曼迷忙住插MK恩外，領隊摩連奴亦都非常忙碌，趕住喺去美國集訓前完成組軍，專心備戰新球季。曼聯喺周四據報成功截車路士糊，以7,500萬鎊（約7.6億港元）豪購愛華頓前鋒盧卡古，加上之前買咗嘅中堅域陀連迪路夫，今夏買兩個新兵已經使過億鎊。不過摩佬喺今個轉會市場肯定仲未收手，再要喺三個位置添球員，紅魔條大水喉仲未閂得住。
喺上季未結束之前，摩佬已經向球會高層活華特交咗今夏收購名單，喺兩閘、中堅、中場同翼鋒四個位置各有四個目標，到季尾伊巴謙莫域受重傷收「咧」，摩佬亦盤算要買中鋒代替佢。𠵱家曼聯已經收購咗中堅連迪路夫，同喺美國UCLA拍住保羅普巴一齊訓練嘅前鋒盧卡古亦都好事近，餘下要為其餘幾個位置增兵而努力。
摩佬失「馬」吼小蜜蜂
摩連奴原本希望收購舊部尼曼查馬迪，不過佢搶咗車路士獵物盧卡古，車仔未必會咁順攤放馬迪過檔，據報紅魔將會轉移目標收購「蜜蜂兵團」多蒙特嘅祖利安韋高，但兩人嘅類型都幾唔同，睇吓之後事態發展係點啦！
至於曼聯其他斟介對象都仲係比列錫同埋艾華路莫拉達等。紅魔將會喺今個月16號，喺美國進行首場季前熱身賽，預計未來一星期會加快轉會運作步伐。
