本周三新任特首林鄭月娥向立會釋出善意，話要改善行政立法關係，而換咗新老闆嘅政務司長張建宗，亦自然好識做，佢代表新政府第一次見立會內會正、副主席就賣晒口乖，話議員提乜意見都有得傾，同689年代唔同晒。
內會主席李慧琼噚日喺內會匯報同張建宗見面，話副主席郭榮鏗提出，期望新一屆政府加強同議員溝通，要求張盡快檢視法案、議案同撥款申請優先次序，編排議程時亦要多與議員商量。
琼子引述張話新政府會展示新風格、新氣象，講明加強同立會溝通，又話會檢視議案優次，再通知立會，自己仲會主動約見唔同政黨，之前建制派仲話行政立法關係差未必關689事，但係𠵱家冇咗梁振英，張建宗連態度都積極晒。