盛傳今夏想離開皇家馬德里嘅基斯坦奴朗拿度（右），最近去伊維薩島度假，除咗帶阿媽、女友佐真娜（左）、七歲嘅小C朗之外，就連啱啱出世嘅龍鳳胎Eva同Mateo都有份，齊齊享受家庭樂。不過，英國《太陽報》就爆料，話C朗玩之餘，仲會上巴黎聖日耳門班主艾卡拉菲隻遊艇，秘密傾轉會一事。之前傳佢可能重返曼聯，但隨住紅魔周四重金引入盧卡古，睇嚟難以成事。
另外，喺葡萄牙馬德拉島嘅CR7博物館，最近就有兩對新C朗水晶波鞋（小圖），係波鞋贊助商「一剔」同水晶玻璃工藝製造商Swarovski合作嘅新系列，由藝術家T Daniel設計。呢兩對鞋有曼聯同皇馬版本，一個有英超Logo，另一個就有La Liga字樣。
