中國航母遼寧艦訪港，立法會成班建制派議員噚晚有得上船開party，為咗唔令立會開會阻佢哋登艦打卡，可謂耗盡心力，更被指涉嫌公器私用，用立法會資源趕上船！
要求政府加開駁船
話說行會成員林健鋒噚日朝早10點，已打電話同特區政府溝通，要求政府下晝5點半班接駁船外，再喺6點50分加開一班，方便建制派6點半開完財委會後仲趕得切上船，唔使「蘇州過後冇艇搭」，有建制派私下亦指，此舉可避免建制派因為喺財委會人數不足，遭泛民突襲。
除咗林健鋒發功，八方得悉，原來建制派班長廖長江亦有份發功，主動聯絡立會秘書處提供立會專車，接載建制派議員去中環碼頭趕上船！據知廖向建制派議員講，秘書處答應安排車牌「LC2」同「LC3」兩部車，噚晚6點半起喺立法會門外等議員上車，更預告如議員太多載唔晒，更可以「走兩轉」！
八方噚日財會後落立會門外，果然見到立會兩部車停泊喺門口，仲有兩名司機一直守候，最終卻只見工聯會郭偉強上咗「LC3」去碼頭，「LC2」同司機呆等15分鐘，見冇議員上車後開走。
事後班建制議員紛紛喺fb開live同上載喺遼寧艦嘅相，不知玩得幾開心，不過白鴿黨議員林卓廷批評，建制派今次為趕去遼寧號不惜公器私用，做法相當離譜，認為應該向巿民道歉，立法會秘書處回覆時就話，「由於有多位議員須在財委會完結後趕赴中環碼頭出席一項官式活動，秘書處應議員要求借出車輛方便議員準時應約」喎。
李八方
