自從梁振英卸任特首之後，唔知係咪聽咗人大常委范徐麗泰「提醒」，叫佢要不在其位，不謀其事，所以冇乜見佢曝光。
噚日朝早特區政府搞歡迎中國航空母艦遼寧號訪港，都唔係好見佢，好多政界人士仲以為佢唔喺香港。不過到夜晚喺遼寧號上面搞晚宴，佢就拖埋老婆同個女出席，有政圈好事之徒話，老董都係政協副主席，仲成80歲都一早去歡迎遼寧號，梁又係政協副主席，冇理由「吞卜」朝早唔到夜晚先到！
講開梁振英，以前佢不時會喺facebook貼相發文，但自從佢卸任之後，fb冇再更新，最近嘅貼文仲係6月26日同6名司局長係國家博物館「香港回歸祖國20周年成就展」綵排selfie ，唔知係咪以往fb貼文都係前白宮發言人馮煒光搞， 𠵱家冇咗馮煒光就唔識做？定係689覺得自己都唔做特首，仲使乜搞公關應酬你班市民？