噚日剛好係前特首董建華嘅生日，仲係80歲大壽㖭，不過佢生日都好忙，又要出席歡迎遼寧號訪港儀式，中午又要去午餐會致辭，不過老董呢個生日都應該過得開心，因為噚日見到佢力撐嘅林鄭月娥做到特首，仲同林鄭嚟一個抱抱，可以當慶祝生日。
80大壽 盧溝橋事變日出生
唔講唔知，原來老董喺1937年7月7日盧溝橋事變當日出生，喺呢個咁特別嘅日子，成80歲嘅老董一日走幾場。老董同林鄭月娥噚日中午出席一個國際法交流研討兼午餐會，老董致辭時大讚林鄭月娥聰明、勤奮、努力工作，獲得中央同香港人信任，令佢老人家對香港未來發展好樂觀！咁就梗係喇，當日林鄭未宣佈選特首，老董就已經用佢嘅擁抱作表態，撐林鄭月娥，咁林鄭選到特首就梗要全力唱好，到老董致辭完落台，又走去同林鄭嚟一個深情擁抱，以示佢支持林鄭！
八方見到老董抱住林鄭笑到見牙唔見眼，估老董可能心諗，今次怕且唔會好似5年前咁，再押錯注落個民望低嘅梁振英身上喇！