隔牆有耳：
LEGO二號店神還原老銅 - 李八方

繼旺角朗豪坊之後，全港第二間LEGO認證專門店，聽日就會喺銅鑼灣時代廣場9樓開幕。八方噚日搶先去睇過，一入門口就畀隻兩米幾高嘅星戰黑武士模型鎮住，隔籬仲有幅3米乘1.5米高嘅LEGO馬賽克畫，Pop Art風格砌出點心、菠蘿油等本地特色美食。

全場最吸引就要數中央展櫃嘅羅素街電車廠主題模型，由港產樂高認證專業大師Andy設計，用25至30萬粒積木重現30年前未起時代廣場之前，銅鑼灣附近一帶嘅外貌，無論係堅拿道天橋、唐樓定街市都忠實重建。Andy話模型加入咗好多特色細節，好似天台練武、鵝頸橋打小人咁，提醒大家記得留意。
店內仲引入本港首張數碼Play Table，以螢幕取代普通底板，引導小朋友發揮創意。另有AR應用程式，可以企喺指定海報前同唔同造型嘅3D minifigure打卡。