林鄭月娥上任後推動嘅新風，唔知大家feel唔feel到？但相信一眾政府官員置身其中，肯定知道未來有好多新嘢，無論大大小小，都要着力推動。好似林鄭噚日喺政府新聞處位於嘅海港政府大樓會議室同傳媒會面時，竟然關注埋在場嘅backdrop（背幕）！
事緣未入正題回應火熱議題前，林鄭例牌講幾句開場白，擔任發展局局長期間曾力推「起動九龍東」發展嘅佢，果然對呢個項目好上心，見到現場backdrop係望向港島嘅維港景色就有感而發，話九龍東其實積極發展中，例如啟德發展計劃，與此同時談及九龍西，指九西嗰邊會有高鐵條線，稍後又有故宮博物館，九龍東西都發展迅速，新聞處係咪可以考慮換吓背幕景致，嘩，新女特首睇嘢真係好細緻！