唔少打工仔想成家立室，最低條件少不免都要諗諗，自身經濟係咪有番咁上下，先至有機會成事。就算唔買樓都好，最起碼可以一個負擔得起成頭家嘅開支。
而做得騎師，就算全年冇乜點贏馬都好，每月收入都跑贏唔少打工仔，所以呢個行業嘅人基本上好多都係筍盤。如果本身又靚仔又型，仲要今季已贏咗40頭馬嘅話，就直情係筍盤中嘅筍盤。
不過可惜，呢個黃金筍盤昨晚（6日）已經宣佈封盤了，因為23歲澳洲籍好手祈普敦於社交網絡平台公佈，就同多年女友Morgan Meyer正式拉埋天窗。
小祈仲送咗一粒巨型求婚鑽戒畀現時嘅未婚妻Morgan，亦講到Morgan知道佢求婚後，先大笑，然後喊住話小祈是idiot（傻瓜），再答應求婚，呢刻令自己知道眼前嘅，就係對的人，真係就算隔住熒幕齋睇字，都覺得佢哋兩口子呢刻幸福到爆。
而唔少馬圈中人，例如葉楚航，田泰安等人知道消息後，都紛紛恭喜小祈即將小登科，而正養傷嘅炒飯哥羅理雅，亦都有留言「Well done,Brother」，話小祈做得好。
圖片來源：Ig@samclipperton