林鄭月娥上任特首後5日急急腳去立法會出席特首答問會，言行以至推出嘅措施、政策，都擺出姿態講明自己唔係CY 2.0。睇番林鄭周三喺立法會嘅發言內容，睇嚟「成功爭取」嘅大贏家，包括專業議政梁繼昌喎！
事緣林鄭做候任特首時，先後約見唔同政黨聽意見，梁繼昌早喺5月初就去信林鄭提出幾點建議，包括盡快將《防賄條例》第3至8條適用於特首、改革中策組、將施政報告時間恢復至10月宣讀等，全數Bingo。八方問過當事人，佢都笑笑口話有留意到！
梁繼昌一直對前特首梁振英UGL事件窮追不捨，被689視為眼中釘，不但遭689入稟控告，更被瘋狂發網誌攻擊，估唔到佢嘅意見，林鄭卻咁鬼啱聽，唔知喺UGL事件上會唔會都參考吓對方嘅睇法？