前特首梁振英任內最爭議人物，相信非日薪一萬嘅新聞統籌專員（IC）馮煒光莫屬，自比「白宮發言人」嘅佢上任後頻頻爆公關災難，尤其頻頻喺fb撰文護主兼同外界開拖，好多人都覺得公帑使得冤枉，而新特首林鄭月娥上場後至今都未公佈IC人選，噚日提及仲搵緊人，但明言IC職能唔應該玩fb兼同人駁火，馮煒光聽完會唔會嬲嬲豬？
其實馮煒光任內另一職能同職責就係跟住689出入，幫佢影相兼發送去梁粉陣地「港人講地」，相信林鄭搵嘅新IC，絕對唔需要再做呢啲工作，因為佢明言IC係協助佢同陳國基做嘢，應該低調兼同傳媒保持良好關係，IC本身都唔應該玩fb，當然唔應該同人駁火，個人傾向由傳媒人出任，但至今未有人選，其間頻頻就此問陳國基，皆因原來搵IC嘅重任，落咗喺呢位佢背後嘅重量級男士身上。
至於新開嘅fb，林鄭話啲內容係自己拋idea出嚟，亦有自行「供相」，例如行會召集人陳智思早前嘅行山相，都係佢手機發送。
林鄭開放留言但唔睇
佢亦一反前特首梁振英做法，決定開放畀公眾留言，但佢好坦白咁笑住話「我都唔睇（留言）」，「睇埋咪唔使瞓？」
至於冇得留低嘅馮煒光，繼續玩fb貼出北韓之旅嘅相片，當中唔少係同當地女性合照，包括佢稱為平壤「地標」嘅美女交通警同學生妹。佢啲friend仲留言「好多美女相伴」、叫佢「帶個女朋友回港」。
李八方