練馬師鄭俊偉喺今朝（6日）嘅晨操神情顯得勁緊張，仲親自落機坪指手劃腳，更大大聲向助手落操練指示，似乎想快啲贏埋最後一場，唔洗自己成日心掛掛。
米高鄭咁緊張當然唔係冇原因，事關現時攞咗15W嘅佢就係練馬師排行榜排尾三，但賽事只餘下最後三期，仲差全季最重要嘅一場勝仗，先可達至季內贏得16W上岸。為咗唔洗收大信封，免得自己個底花晒，今戰肯定搏硬！
而當中最有機會為米高鄭贏馬嘅一場，就係由巫顯東策騎嘅「超然」，將出戰周日（9日）第四場四班泥地1200米賽事。
首先米高鄭15W入面有5W來自泥地，更從中試過攞到7亞4季，顯然呢個馬房練泥地馬係有一手。
再者，巫顯東今季跑埋周日之戰，就因停賽被迫提早唞暑，想爭告東尼獎就只得呢日可搏，騎者戰意肯定唔需要懷疑；而且，近三戰泥地馬排1檔都獲1W1P，「超然」亦於今仗好彩抽到1檔，米高鄭全季最重要嘅一場勝仗似乎非呢場莫屬。