大律師鄭若驊（Teresa）做仲裁冇人唔識，但最近佢個名字爆紅，卻因為新任女特首林鄭月娥，因為盛傳佢係林鄭心目中嘅律政司司長人選，但佢請咗林鄭食檸檬。最終袁國強捱義氣留任過渡，據聞搞完一地兩檢先離開熱廚房。
林鄭班子人選塵埃落定，Teresa亦開腔，佢話好高興袁國強留任，希望大家支持對方。咁究竟有冇人邀請佢入熱廚房？佢只稱「同Carrie（林鄭）成日都見」，見親面都「討論香港應該點樣」。
袁國強雖然係「最後武士」，但政治一日都嫌長，Teresa會唔會好快有新動向？佢即刻話𠵱家擔任亞洲國際法律研究院主席，研究院「唔係一年貨仔，亦唔只5年」。咁即係No？佢只係話，研究院係團體工作，自己只係「幫頭幫尾」，唔喺度都冇問題，冇封晒後路。