喺瑞銀財富管理部年代，經常預測股市走勢嘅何偉華（Patrick），舊年轉咗去瑞信私人銀行部門做股票研究，唔夠一年又轉咗工，最新係去咗滙豐私人銀行，跟投資策略部阿頭范卓雲（Fan）搵食。
Patrick喺分析呢行相當資深，中大經濟畢業後，喺投行做過12年證券研究，包括法巴、貝爾斯登、星展唯高達等，主力係睇銀行股為主嘅金融板塊，之後走咗去瑞銀財富管理，同舊主管浦永灝拍住上，經常點評大市、板塊升跌。
至於點解做咗一年唔夠就離開瑞信，呢個真係要等Patrick解畫，但Fan就大讚Patrick，認為佢搵投資主題，同策略上非常資深，再加上喺私人銀行嘅經驗，相信會扮演重要角色。照咁講，認真要拭目以待佢嘅大作。