周不時都有馬迷喺賽後怒插，話呢場邊個騎師拉馬，嗰位騎師陣上又扮去馬，搞到自己輸錢之餘，仲谷埋成肚氣。
其實，點樣判斷是否拉馬呢？用八十年代中轟動一時嘅「楊元龍造馬案」就係最啱例子。富商楊元龍因與多位騎師串謀控制賽果，最終罪成而被判囚，但佢聲稱患了末期癌症，只餘下兩年命，申請保外就醫獲批，即時飛咗去美國，但一去就冇回頭，仲多活了廿餘年才病逝。而當初為楊元龍診症的醫生，因為造偽證而入獄，做咗楊元龍嘅替死鬼。
最為人津津樂道就係，轉做特赦證人出庭作供嘅大摩細佬摩加利，當年佢喺法庭上披露所謂「十大拉馬手法」，仲播埋賽事影片加以闡釋，但特別嘅一點就係摩加利正正就係呢件案嘅拉馬主角。
當然，「十大」只是籠統說法，唔係咁啱剛好十種，佢所披露嘅拉馬手法包括：出閘Dun一Dun令馬匹失了先機；前段力騎不讓馬匹回氣；刻意走馬林中間令自己無路可上；全程走外叠蝕盡腳程；用技巧令馬匹甩口；直路打虛鞭；催策時推前的力度少而拉回的力度大；錯誤韁繩指令導致馬匹出錯腳而亂步等等，雖然摩加利避得開刑事檢控，但當年馬會就重判佢停牌十年。
回顧完呢件拉馬案，各位馬迷不妨看看現在的人馬，在陣上有沒有出現上述情況。