今個月19號就係書展，今年主題係旅遊，大家除咗買旅遊書去日韓台打卡血拼selfie，其實唔少人都會出遊記寫深度遊，大會就邀請咗探險家李樂詩、小說作家金鈴等喺書展期間舉行講座，分享旅行所見所聞。
去過冰島旅行嘅金鈴分享途中軼事，佢請咗個司機車佢去酒店，由首都一路向南，坐咗5個鐘頭車，正當仲差1個鐘就到酒店嘅時候，司機竟然停低唔肯再向前行，話因為天文圖顯示過去1個鐘，前方路段風速太大好危險。
金鈴就聽司機話唔再出發，司機話原來好多遊客、尤其亞洲人都唔係咁乖，以為冬天揸車周圍去好正，其實最容易出事。
金鈴話呀，旅行對好多港人嚟講都係必需品，但最重要都係用咩態度去旅行，覺得尊重最緊要，無論去咩地方都好，人哋嘅建議都係由經歷累積而成，應該尊重。