36歲嘅泰利，告別效力咗22年嘅車路士之後，終於展開成為阿士東維拉球員嘅新時代，周二呢位前車路士隊長飛抵葡萄牙法魯，會合維拉一班新隊友一齊進行季初集訓，不過佢對藍戰士仍未忘情，提議加利卡希爾接任隊長之餘，仲話「I will be back！」，總有一日會返車仔做領隊。
同布魯士波友變下屬
泰利周一先宣佈加盟英冠球隊維拉，周二已經飛到葡萄牙同大軍會合，一啲都冇因為自己係前英格蘭同車路士隊長而偷懶，就算身邊嘅隊友，由以前夏薩特、尼高路簡迪等足球先生，變咗做侯頓、蘭斯貝利等英超棄將，都一樣冇詐型，同班隊友有講有笑。最搞笑就係同維拉領隊布魯士關係，兩位前英格蘭中堅原來之前係高爾夫球波友，上個月仲一齊參加慈善賽，今時今日泰利就要聽布魯士點嘞。泰利亦話自己喺球隊冇特權，𠵱家有冇得做隊長都未知，要等布魯士安排，而且踢得唔好一樣會俾布魯士貶為後備。
維拉新球季嘅首場英冠比賽，就係八月五日主場對領隊布魯士嘅前東家侯城，睇吓泰利會唔會揭幕戰就上陣。
推薦卡希爾做隊長
雖然離開咗車仔，泰利對球會感情仲好深厚，好似新一季隊長人選，佢就有建議，泰利話：「加利卡希爾係好合適人選，佢唔單止球場上，連更衣室都有領導能力；佢效力車仔已經五年幾，夠晒資歷，而且好多人都忽略佢嘅才能，其實佢就好似一座大山咁守護球隊；當然啦，最後始終係干地（車路士領隊）決定邊個係新任隊長。」
講起車仔領隊，泰利亦都吼住呢個位，代表車路士上陣717場比賽，贏過五次英超冠軍同一次歐聯冠軍等無數獎項，泰利就話：「我對任何事都抱有遠大理想，唔怕發夢發得太大。未來日子我會踏足執教範疇，返車路士領軍係我嘅終極夢想。」
36歲嘅泰利嚟到維拉純粹只係擔當球員，唔會參與教練工作，不過佢話會向領隊布魯士好好學習，偷定師第日用。泰利話：「過去有唔少例子，球員退休冇耐就轉做教練，但就唔算成功，喺我呢一代，都唔少球員退休後都未搵到教練工作，所以我先會保持耐性，慢慢吸收經驗都未遲。」