雖則今日（5日）係星期三，但各馬迷唔好以為快活谷馬場今晚會舉行夜賽，因為今晚其實係冇馬跑，所以無論本地或外籍騎師今朝早好多都冇蒲頭操馬。
話就話冇乜騎師，搞到個場靜英英，但望真啲個晨操表，就會發現有位外籍騎師今早極有動靜，一個人操了六匹馬，成個駐場騎馬人咁款，佢就係澳洲年輕好手祈普敦。
祈普敦操過的六駒中，有五駒來自大摩馬房，分別為「彩福」、「有禮」、「喜旺寶」、「架勢堂」及「共創更好」，餘者則是賀賢馬房「盈華盛甲」。
當中「架勢堂」最為特別，因為呢匹馬係大摩馬房唯一之五班馬，已報可周日（9日）五班1400米賽事。如果成功贏到嘅話，呢匹現評38分嘅賽駒就會升上四班，從中亦會令到大摩成為繼蔡約翰後另一個冇五班馬的練馬師。
呢匹馬今季運氣麻麻，七戰有五次都抽雙位數檔位，惟上仗喺祈普敦胯下由最外14檔起步，都唔係輸到離行離列嗰隻。
今次如果好彩啲，抽到較貼內欄嘅檔位，以祈仔呢朝咁積極嘅舉動，隨時幫到匹馬大翻身！