華人騎師梁家俊於七一回歸賽馬日，第五場策騎「勁飛寶寶」出賽，佢事後話沿途都冇覺得有乜嘢唔妥，但跑完解鞍之後，就感到肚、腸越來越痛，直頭行都行唔到，平攤在騎師室內地上。
當時經過駐場醫生檢查後，家俊仔即被送入威爾斯親王醫院，被醫生發現有腸套叠問題，要立刻做手術治療，之後就一直留院休養，需時兩至四星期，個人在今季餘下時間內，都不會再策騎出賽同操馬。
據醫生講呢種病癥多見於嬰兒，出現在成年人身上十分罕見，家俊仔可謂不幸，惟亦好在當時搶救及時，否則後果可能好嚴重。
至於連日奔走醫院同屋企之間，以照顧老公的人妻阿Kit，見好老公的情況已穩定下來，自己放下心頭大石，亦不忘透過FB報告老公近況，以回應各界對老公的關心。
阿Kit最初在FB發文時謂「我和寶寶以你為榮」，從中暗示自己懷有梁家骨肉。佢話【蘋果】當日率先報道自己老公的情況，獲得馬迷、網民慰問同關心，令他們兩口子感到一份窩心的暖意。
為此，佢專登今日（5日）在FB拉闊直播與馬迷互動，回應提問並藉此回謝馬迷，佢透露腹中寶寶現時為三個幾月，並表明雖然寶寶係男仔，但唔想佢將來做騎師，免得自己多一重擔心，同時覺得自己老公梁家俊有事，但同時間講咗呢件喜訊出嚟，感覺有啲矛盾。
所謂仔大女大，梁家寶寶最終做邊行，將來父母未必可以幫佢揸弗㗎。至於梁家俊暑假安排亦因為啱做完腹部手術，醫生建議休息兩至四星期，所以不會出外客串。
梁家俊今年暑假將留守香港大本營，暫定8月頭左右恢復操馬，以迎接9月3日展開的新馬季。