醜死怪！格拉斯哥流浪（左圖）禮拜二場歐霸盃外圍賽，作客0:2輸咗畀魚腩盧森堡嘅尼達干，兩回合計1:2出局，開個10.2倍冷主W之餘，2:0波膽有50成倍。跟球隊作客到盧森堡嘅2,000名格流球迷見證愛隊史上其中一場最尷尬敗仗後，谷埋成肚火，有超過100名球迷喺場外包圍格流隊巴發洩不滿，對住上隊巴嘅球員喝倒采（右圖）。
格流領隊卡仙拿賽後接受球會官方電視訪問嗰陣話明白球迷點解咁嬲，又話球迷對球隊好忠誠，唔應該面對咁嘅事，佢話：「我要承擔所有責任，我哋達唔到贏波任務。我哋要吸取呢個教訓……」
係就係孭晒責任上身，仲肯同球迷道歉，但唔少fans喺社交網站都要求佢落台。卡仙拿就話唔會辭職，對前景仍然樂觀，而且佢覺得自己仲係格流領隊嘅最適當人選喎。不過輸畀隊之前13場歐洲賽事一場都未贏過嘅魚腩尼達干，搞到歐霸盃出局，真係唔知卡仙拿返到去點同老細解釋。