香港首位女特首林鄭月娥向來愛喺大時大節着旗袍，早前喺facebook透露擁有卅多套旗袍，並且好環保，會重複再着，例如國家主席習近平訪港期間，只有宣誓時嘅旗袍係全新訂做，而佢噚日朝早出席上任後首個立法會特首答問大會，亦以旗袍look上陣，睇番呢襲滿佈蝴蝶圖案嘅旗袍，原來同佢前日主持首個行會時嘅旗袍一樣噃，只係換上唔同顏色嘅外套，唔通忙到喺辦公室過夜，冇返屋企換衫？
配飾一樣 僅換外套
八方認真細心再睇，原來唔只嗰套旗袍，就連林鄭戴嘅耳環、以及佢着上嘅高踭鞋，都同前日開行會一樣㗎，唔通林鄭呢套旗袍，對佢嚟講特別有意義，所以成為連續兩日娥姐變蝴蝶嘅戰衣？又抑或，百日施政大計令佢忙到冇氣唞，要喺辦公室過夜，連屋企都冇返，因而冇得換衫？冇理由佢會有兩套一式一樣嘅旗袍啩！
雖然各界都認定林鄭好打得，但打得極都要休息嘅，八方八過嘞，林鄭前晚係有返屋企休息、唔係喺辦公室過夜，但正如佢之前所講，嚟嚟去去都係卅幾套旗袍，咪翻着同一旗袍，換吓外套當新配搭囉！
李八方