【向世界升學】張堅庭嘅23歲大仔張高銘（Justin）舊年喺紐約大學名府Tisch學院電影畢業，嚟緊會去羅省做實習，之前佢拍咗一條關於佢哋家傭YaYa嘅紀錄片，希望為傭工發聲。阿庭支持囝囝讀電影：「佢鍾意讀乜咪讀乜，我冇意見，佢讀考古又得，讀鋼管舞有學位，冇乜所謂，critical thinking先係重要。」而Justin就認為：「我由細到大都鍾意睇戲，拍自己電影，唔一定有古仔，好似拍屋企旅行，甚至追女仔，我覺得寫一封情書唔夠好，拍電影對我係最好表達方式。」
「讀乜冇所謂」
Justin喺大學除讀電影，有讀考古、政治學、人類疾病等課程，豐富自己眼界，更因身邊嚟自聯合國嘅同學、烏克蘭籍女友，通過互相辯論、影響，增加對知識好奇心，而阿庭就認為Justin變得獨立有紀律。講到做電影工作出路，阿庭認為：「你要記住讀乜嘢科目，基本上早年已有30%唔match，有啲甚至工程師、醫生咁專業都唔match，所以我覺得讀乜都冇所謂，讀電影係同藝術有關係，係視覺藝術，對白嘅藝術、表達藝術，將來個社會係最需要，係學緊一啲謀生工具嘅訓練，出路係好闊。」
場地提供：sfs cafe、odd one out