回歸20年，親共傳媒當然努力獻媚，連香港運動員都不能倖免，大台獲政府資助拍咗個《我們的驕傲》特輯，例牌講吓運動員如何為港爭光，政府又有幾多支援等，政府對體育界真係咁好？大家心知肚明，不過稱得上我們的驕傲，竟然連一個足球員都冇，或者喺香港政府嘅人士眼中，世盃外兩次守和中國，唔係一件值得驕傲嘅成績。
講開驕傲，德國絕對係呢期足球界最值得驕傲嘅國家，先贏U21歐國盃，洲際盃又險勝智利，一年捧兩盃。講番U21歐國盃，教練觀斯係前國腳，1996年仲幫手贏歐國盃冠軍；但呢次冠軍之後，德國就步向黑暗期，1998年世盃八強大敗畀克羅地亞出局，2000年歐國盃以衞冕身份出擊，竟然分組賽不勝出局。
不過德國足總唔似香港政府咁，淨係識沉醉過去光榮，隱惡揚善，所以真係積極建立青訓系統，單係足總已經花費五億歐元以上，派多達1,000位專家教練，全國建立300幾個地區青訓中心，仲要求各級聯賽配合，建立青訓中心，先建立到𠵱家嘅盛世。所以由2006年起，德國每次大賽都至少殺入四強，拎埋2014年世盃冠軍，絕對唔係偶然。
而且德國亦唔自滿，普及足球人口後，𠵱家就開始諗拔尖。德甲新季會試行新政策，各球隊唔再設預備組，當然仍然設U19、U17等梯隊，變相令一隊如果出現唔夠球員嘅情況，唔可以好似以前咁召預備組球員應付，而要由U19球員頂上，令更多年輕球員更早喺頂級聯賽上陣。當然，有利就有弊，年輕球員太早上一隊，一、兩場踢得好就成名，好易衝昏頭腦，不過以德國球員心智成熟，應該都可以克服呢啲障礙嘅。
文：牽牛