林鄭月娥一上任就落柯打，話明新嘅局長要做多啲政策解說工作；娥特嘅旨，局長點敢唔接？再次做局長領軍商務及經濟發展局嘅邱騰華噚日趁立法會開大會，邀約同民建聯黨團見面，聽吓對商經局未來工作意見，另亦有約民主黨尹兆堅等，喺一眾新局長嚟講都算積極，可能因為做開特首辦主任，同各政黨有溝通，要connect亦容易啲。
據聞另一落力嘅新丁局長係運輸及房屋局嘅陳帆，唔少政黨頭目都收到佢來電，邀約有時間就坐低傾偈，唔知係咪為高鐵一地兩檢民意戰打前哨戰？
前商經局局長、現任港鐵主席馬時亨出席電台節目時就對上述兩人畀like，話邱騰華熟悉政策、擅於溝通；過去試過因昂坪360纜車事故同陳帆「行孖咇」落立會解畫，讚對方唔官僚，勤力又好掂。