隔牆有耳:娥特開行會 袁國強冇影 - 李八方

隔牆有耳:
娥特開行會 袁國強冇影 - 李八方

香港首位女特首林鄭月娥第一次主持行會,律政司長袁國強竟然咁大膽缺席,搞到影大合照時唔齊腳?唔係因為只係捱義氣嘅過渡司長而唔畀面女特首啩!
查實呢,袁國強只係到咗奧地利維也納訪問,同奧地利聯邦大律師公會副主席Marcella Prunbauer-Glaser會面,並到訪維也納國際仲裁中心,介紹香港喺仲裁同調解服務嘅最新發展。
香港近年積極推動透過仲裁同調解方式,解決民事同商業糾紛,袁話希望兩地法律專業團體加強法律合作同交流。仲裁中心主席Dr Günther Horvath會面時提及,由於國際貿易日益增長,加上多個中、東歐經濟體有興趣參與一帶一路發展,相信奧地利同香港嘅仲裁服務有龐大合作潛力。