相信大家對於比利時首都布魯塞爾嘅著名地標「撒尿小童」（Manneken Pis）銅像唔會陌生，因應特區成立20周年，「撒尿小童」上周五換上黑色中山裝慶祝一番。
睇番佢嘅服飾設計，融合咗中西元素，襯有香港飛龍圖案同彩色絲帶嘅黑色中山裝，搭配一條黑色牛仔褲，腳踏白色鞋帶嘅紅鞋，手上仲攞住一部平板電腦。原來呢套服裝係2012年由香港駐布魯塞爾經濟貿易辦事處送贈，着完一日後就會歸還布魯塞爾博物館。
其實向撒尿小童捐贈童裝嘅傳統可以追溯至17世紀末，時至今日，撒尿小童一年內換裝達130次，又成日收到新衫，目前已擁有逾900套童裝。撒尿小童上一次着呢套香港衫，係時任商經局局長蘇錦樑2015年10月到訪布魯塞爾期間。