估唔到今夏去到目前為止，英超最豪嘅球隊係愛華頓，周一再簽多兩名猛將，分別係米克堅尼同辛度拉美利斯，連同之前嘅卡拉臣同門將比克福特，已經使咗成8,000幾萬鎊。拖肥咁使錢法，唔係有咩大財團注資，而係以為可將射手盧卡古賣到個好價錢嚟填氹，但呢種先使未來錢嘅做法，我求大俠就戥佢哋擔心。
豪擲2.5億買米克堅尼
講番愛華頓周一點咁瘋狂先，佢哋先宣佈同21歲馬拉加前鋒辛度拉美利斯簽約四年，買斷合約費為530萬鎊，然後相隔不足12小時，再掟2,500萬鎊（約2.5億港元）羅致般尼嘅英格蘭中堅米克堅尼，簽約五年，仲透露連埋附加條款，轉會費可能升到3,000萬鎊，數字同之前以破隊史紀錄轉會費來投嘅門將比克福特相同。
拖肥家吓買咗六名球員，唔計兩個會被外借出去磨練嘅後生仔，下季已經增多四將，使咗8,000幾萬鎊，無懼咁大手筆係因為已經預咗首席射手盧卡古會走，應該有七至八千幾萬鎊落袋，而對象當然就係一直傳想簽番呢位比利時中鋒嘅車路士，只不過車仔都要等迪亞高哥斯達（DC）離隊，先可以騰出空位畀盧卡古回巢。
車仔放走DC先肯出手
問題嚟喇，本來就話DC可能去中超搵食，但自從中國足總推出向球會徵收引援額外費用等政策嚟打擊天價外援後，DC已經唔會過檔，唯一出路就係返去馬德里體育會。不過，馬體會要到出年一月先可以簽球員，如果DC最終唔肯呆等而決定留車仔，咁拖肥就有麻煩。
其實唔止盧卡古，巴克里都係同一問題，據聞想買呢位中場嘅熱刺已經停晒手，證明咁樣先使未來錢極具風險，隨時面臨破產等危機。到底拖肥之後命運會點好難知，但之前傳話想簽番朗尼嘅機會就唔大，因為曼聯喺官網公佈新球季主場波衫嘅廣告，有呢位31歲前鋒份，《太陽報》亦話佢會喺季前美國之旅隨隊。