新時代原來都有新志願，細路哥唔鍾意做醫生同律師咯！香港基督教女青年會去年初以問卷形式訪問1,152名小五至小六學童，發現細路仔心儀志願榜首唔係專業行業，而係明星，多達10.7%受訪小童揀選，運動員（7.8%）同遊戲設計師（7.5%）緊隨其後。
醫生律師三甲不入
向來被視為傳統嘅理想職業如教師、醫生、律師，只係排緊第4、第5及第9位，選擇比率為3%至6.6%，工程師、會計師等仲要十大不入。
若以性別分類，男仔最嚮往做遊戲設計師（14.2%），YouTuber、網絡紅人及遊戲實況主持等則成小童志願新貴，有學童喺「其他」一欄填上以上志願；女生則最希望能成為歌星或明星（16.9%）。
受訪學童又被要求估計父母想自己從事嘅職業，結果「三師」即醫師、律師、老師理所當然成為首三甲，比率佔4.8%至12.2%，似乎父母嘅期望同學童嘅願望，真係有落差。
負責調查嘅女青家庭健康促進中心單位主任施倩俐話喎，兒童志願嘅新興職業冒起，反映細路仔對職業嘅看法已超越成人嘅定性思維同框框。
佢哋揀選嘅職業往往受相關渠道同人物影響，顯示志願同佢哋生活嘅接觸面有極大關係，所以家長同老師應該為兒童安排大量擴闊眼界嘅機會，陪伴佢哋認識同接觸不同類型活動，建立多元化興趣。
李八方