暑假唔少企業都會請intern，原來家陣唔止大學生，連剛剛考完DSE嘅中學生，都可以試下去銀行做「banker」。
話說唔少銀行，好似滙豐、渣打同大新等等，都有參加由扶貧委員會籌劃嘅「友‧導向」計劃，計劃自動配對參加企業同學校，等大家設計唔同類型嘅友師活動。
好似大新銀行，今個學年就有代表去嶺南中學教學生寫CV、求職信，5月尾仲安排兩個星期實習畀8位中六同學仔。
雖然一班同學仔比較young，未必真係應付到真實banker工作，但大新就話，會因應佢哋個性，盡量編配佢哋參與不同崗位，好似活潑啲、鍾意接觸人客嘅同學仔，就會試下落分行工作，都係志在體驗上班族嘅日常工作，等將來升學揀科、揀工冇咁迷茫。