為大摩馬房贏馬最多的騎師是誰？大家如以為係雷神莫雷拉就錯了，今季兩人只合作取12Win，「佳龍駒」已佔四場，撇除這類誰也不能沒有誰，騎練彼此互相依靠的大賽馬匹，可見兩人關係並非如想像中密切。
大摩真正的影子主帥，其實是祈普敦，大家攜手取16場頭馬，敦敦是為大摩贏馬最多的騎師。而祈普敦亦好識做，晨課例化身成摩廐策騎員，勤力幫手操馬，好像今朝(4日)敦敦除試閘外，操了3駒均來自摩廐，分別係「喜旺寶」、「威力東」及「勝利專家」。
其中「勝利專家」已報周日(9日)沙田四班1400米列正選，人馬上仗正是於同班同程跑第二，是此匹4歲馬來港後表現最佳一仗，上次拼後敦敦親操多課，包括今朝他到場後首匹出試，可見對今仗高度重視。大摩下季由貝湯美做主帥，祈普敦的「影子主帥」期快屆滿，現階段梗係搏得就搏啦！