賭王「四太」梁安琪二仔何猷亨近期頻頻現身公司活動，由澳博（880）到四太打骰嘅尚嘉，似乎有意逐步部署接班。而今次唔止生意範疇，連四太做開嘅公職，何猷亨都開始參與，同阿媽齊參選澳門立法會議員！
噚日四太所屬嘅澳門發展新連盟，遞交今年澳門立法會選舉候選人名單與政綱，12人名單中赫然見到何猷亨，出選第三候選人。
四太早於2005年出任立法會直選議員，仲連任3屆，今次叫埋阿仔參選，唔知係咪想佢經歷社會大學嘅洗禮呢？
據了解，25歲嘅何猷亨係首次出選，佢希望透過今次參選機會，鼓勵年輕人多關心社會事務，仲話如果當選，會努力將年輕人嘅聲音帶入立法會，睇嚟佢由𠵱家去到9月17日投票日，都要忙住周圍拉票。