由中大文物館及周大福大師工作室主辦、康文署文物修復辦事處協辦嘅「鑠古鑄今：中國古代黃金工藝與傳承」展覽，今日（4日）至9月27日喺中大文物館舉行，展出40幾件中國古代金銀器，並介紹中國古代黃金嘅製造方法，包括珠化、金絲以及錯金銀等，連同同場另一展覽展出嘅60件陝西省珍藏嘅中國古代金銀器，兩個展覽展出逾100件金銀器，市民免費入場有得睇。
展品之一嘅「秦式青銅錯金帶鉤」採用錯金銀嘅工藝方法，將金片藏入預先做好嘅凹槽上，用肉眼睇會發現表面嘅金線好平滑，但喺X光下，就會發現金線係捲嘅方式錯入凹槽中。同樣嘅錯金銀方式亦可見於另一件展品「青銅鎏金錯銀羽入乘龍紋帶鉤」。「金錐形飾耳墜」則採用合金技術，於黃金中加入銅，令耳墜表面顯得更閃亮。